«Сақтаймыз және көбейтеміз!» «жасыл» науқаны

Экологиялық білім беру-қазіргі білім беру жүйесінің өзекті мәселелерінің бірі. Білім беру үрдісінде экологиялық білім мен тәрбие беру үздіксіздігі мен сабақтастығының маңызы ерекше.

Балаға экологиялық тәрбие беру, экологиялық мәдениетін қалыптастыру, табиғатқа, қоршаған ортаға деген  құрметін арттыру балабақшадан басталады. Баланы мектеп жасына дейінгі кезеңнен өзі өсіп-өнетін ортасын, қоршаған табиғатты бағалай білуге және оларға ұқыпты қарауға үйрету керек. Оларды жүзеге   асыру үшін түрлі экологиялық іс-шаралар ұйымдастырылып өткізіледі. Осындай іс-шаралардың бірі - «Сақтаймыз және көбейтеміз!» «жасыл» науқаны.

Жастарды ормандарды сақтау, қалпына келтіру және көбейту, қалалар мен аудандарды көгалдандыру, білім беру ұйымдарының аумақтарын абаттандыру ісіне  тарту мақсатында облыстық балалар  мен жасөспірімдер туризмі, өлкетану және экология орталығы 15 сәуірден бастап Ақмола облысының білім беру мекемелері арасында «Сақтаймыз және көбейтеміз!» «жасыл» науқанын  жариялады.

Облыстық балалар мен жасөспірімдер туризмі, өлкетану және экология орталығы Көкшетау қаласының «ZEREK» балабақшасына 30 қарағай көшеттерін сыйлады,    Орталық қызметкерлері  балабақша қызметкерлерімен, тәрбиеленушілерімен және олардың ата-аналарымен бірлесіп, балабақша аумағында шағын саябақты бөлуге қатысты.

Біз жас ұрпақты табиғатты сүюге және құрметтеуге үйрете отырып, планетамыздың жасыл болашағына бүгін үлес қоса аламыз. Балалар мен жастарды қоршаған ортаны қорғауға тартудың тамаша тәсілі - ағаш отырғызу. Ағаштар қала тұрғындарын табиғатқа жақындатады. Салауатты қалалық ағаш желектері - бұл адамға табиғи ортаға деген сезімін қайтарудың ең тиімді әдісі. Балалардың осындай іс-шараларға қатысуы экологиялық тәрбиені қалыптастырады.

Іс-шара соңында Көкшетау қаласының «ZEREK» балабақшасы  ұжымына науқанға белсенді қатысқаны үшін Орталықтың алғыс хаттары табыс етілді.